Psalms 37

দায়ুদৰ ৰচিত গীত

1তুমি দুষ্ট লোকসকলৰ কাৰণে অস্থিৰ নহবা;
কুকার্য কৰাসকলক দেখি হিংসা নকৰিবা।
2কিয়নো তেওঁলোক ঘাঁহৰ দৰে শীঘ্রেই শুকাই যাব,
সেউজীয়া তৃণৰ নিচিনাকৈ জঁয় পৰিব।

3যিহোৱাত ভাৰসা ৰাখা আৰু সুকৰ্ম্ম কৰা;

দেশত বাস কৰা আৰু নিৰাপদে থকা।
4যিহোৱাত আনন্দ কৰা;
তাতে তেওঁ তোমাৰ মনৰ বাঞ্ছা পূর্ণ কৰিব।

5তোমাৰ পথ যিহোৱাত সমৰ্পণ কৰা;

তেওঁত ভাৰসা ৰাখা; তাতে তেৱেঁই সকলো কৰিব।
6তেৱেঁই তোমাৰ সততা দীপ্তিৰ দৰে উজ্জ্বল কৰি তুলিব;
তোমাৰ ন্যায় কাৰ্য দুপৰীয়াৰ ৰ’দৰ নিচিনাকৈ প্ৰকাশ কৰিব।

7যিহোৱাৰ আগত শান্ত হোৱা;

ধৈৰ্যেৰে তেওঁলৈ অপেক্ষা কৰা।
যি মানুহে নিজৰ দুষ্ট পৰিকল্পনাৰে কৃতকাৰ্য্য হবলৈ কর্ম কৰে, তাত তুমি অসন্তোষ্ট নহ’বা;

8ক্ৰোধ এৰা, কোপ ত্যাগ কৰা;

বেজাৰ নকৰিবা, কেৱল হানিহে হয়।
9কিন্তু দুষ্টবোৰ উচ্ছন্ন হব, কিন্তু যিহোৱালৈ অপেক্ষা কৰা লোকে হলে দেশ অধিকাৰ কৰিব।
10কিন্তু অলপতে দুষ্টলোক শেষ হৈ যাব; তুমি যত্নেৰে বিচাৰিলেও তেওঁলোকৰ ঠাইত তেওঁলোকক পোৱা নাযাব।

11কিন্তু নম্ৰসকলে দেশ অধিকাৰ কৰিব; প্ৰচুৰ আশীর্বাদ পাই তেওঁলোক আনন্দিত হব।

12দুষ্টই ধাৰ্ম্মিকলোকৰ বিৰুদ্ধে কুমন্ত্ৰণা কৰে;
তেওঁলোকৰ বিৰুদ্ধে দাঁত কৰঁচে।
13প্ৰভুৱে তেওঁলোকক দেখি হাঁহিছে;
কিয়নো তেওঁ দেখছে যে, তেওঁলোকৰ শেষ দিন চাপি আহিছে।

14দুখী-দৰিদ্ৰক বিনাশ কৰিবলৈ আৰু সৎ পথত চলাসকলক বধ কৰিবলৈ,

দুষ্টবোৰে নিজৰ তৰোৱাল উলিয়াইছে আৰু নিজৰ নিজৰ ধনু ভিৰাইছে।
15কিন্তু তেওঁলোকৰ তৰোৱাল তেওঁলোকৰ নিজৰ বুকুতে সোমাব,
আৰু তেওঁলোকৰ ধনু ভঙা হব।

16দুষ্টলোকৰ প্রচুৰ ধনৰাশিতকৈয়ো,

ধাৰ্ম্মিকৰ অলপ সম্পত্তিয়েই ভাল।
17কিয়নো দুষ্টবোৰৰ বাহু ভঙা হব।
কিন্তু যিহোৱাই ধাৰ্ম্মিকসকলক ধৰি ৰাখিব।

18সিদ্ধ লোকৰ সকলো দিন যিহোৱাই জানে,

আৰু তেওঁলোকৰ আধিপত্য চিৰকাললৈকে থাকিব।
19সঙ্কটৰ সময়ত তেওঁলোক লাজত নপৰিব,
আৰু আকালৰ সময়ত তেওঁলোক তৃপ্ত হব।

20দুষ্টবোৰ বিনষ্ট হব,

যিহোৱাৰ শত্রুবোৰ পথাৰৰ তৃণৰ শোভাৰ সদৃশ হব;
তেওঁলোক অদৃশ্য হৈ যাব; ধোঁৱাৰ নিচিনাকৈ তেওঁলোক নোহোৱা হ’ব।
21দুষ্টই ধাৰে লয়, কিন্তু তাক পৰিশোধ নকৰে;
কিন্তু ধাৰ্ম্মিক লোক দয়াৱান আৰু দানশীল।

22যিহোৱাৰ আশীৰ্ব্বাদ পোৱাসকল পৃথিবীৰ অধিকাৰী হব,

কিন্তু যি সকলক তেওঁ অভিশাপ দিয়ে, তেওঁলোক উচ্ছন্ন হব।
23যিহোৱাই আমাৰ খোজৰ গতি স্থিৰ কৰে;
তেওঁ তেওঁৰ পথত সন্তোষ পায়।
24তেওঁ উজুতি খাই পৰিলেও নিচেইকৈ পতিত নহব;
কিয়নো যিহোৱাৰ হাতেই তেওঁক ধৰি ৰাখিছে।

25মই যুৱক আছিলো, এতিয়া বুঢ়া হ’লোঁ;

কিন্তু মই ধাৰ্ম্মিকক ত্যাগ কৰা,
নাইবা তেওঁলোকৰ বংশধৰসকলে ভিক্ষা কৰা, এনে কেতিয়াও দেখা নাই।
26ধার্মিকসকল সদায় দয়ালু, আৰু তেওঁলোকে ধাৰে দিয়ে;
তেওঁলোকৰ বংশই আশীৰ্ব্বাদ পায়।
27তুমি দুষ্টতাৰ পৰা আতৰি আহাঁ আৰু ভাল কৰ্ম্ম কৰা;
তুমি চিৰকাল জীয়াই থাকিবা।

28কিয়নো যিহোৱাই ন্যায় বিচাৰ ভাল পায়,

তেওঁৰ ভক্তসকলক তেওঁ পৰিত্যাগ নকৰে;
অনন্ত কাললৈকে তেওঁলোকক ৰক্ষা কৰা হ’ব;
কিন্তু দুষ্টসকলৰ বংশক হলে ধ্বংস কৰা হ’ব।
29ধাৰ্ম্মিকসকল পৃথিবীৰ অধিকাৰী হব;
তেওঁলোক তাত সৰ্ব্বতিকাললৈকে বাস কৰিব।
30ধাৰ্ম্মিকৰ মুখে জ্ঞানৰ কথা প্ৰচাৰ কৰে,
তেওঁলোকৰ জিভাই ন্যায় কথা প্রকাশ কৰে।

31তেওঁলোকৰ ঈশ্বৰৰ ব্যৱস্থা তেওঁলোকৰ হৃদয়ত আছে;

তেওঁলোকৰ ভৰি পিছলি নাযায়।
32দুষ্টলোকে ধাৰ্ম্মিকলৈ খাপ পাতি থাকে,
তেওঁলোকক বধ কৰিবলৈ বিচাৰে।
33কিন্তু যিহোৱাই দুষ্টলোকৰ হাতত তেওঁলোকক এৰি নিদিব,
বিচাৰত তেওঁলোকক দোষী নকৰিব।

34যিহোৱাৰ অপেক্ষাত থাকা, তেওঁৰ পথত চলা;

তাতে তেওঁ পৃথিবীৰ অধিকাৰী হবলৈ তোমাক উন্নত কৰিব।
দুষ্টবোৰ উচ্ছন্ন হ’লে তুমি তাক দেখিবলৈ পাবা।

35মই দুষ্টলোকৰ অত্যাচাৰ বৃদ্ধি পোৱা দেখিলো,

লেবানোনৰ এৰচ গছৰ দৰে বাঢ়ি যোৱা দেখিলোঁ।
36কিন্তু মই পুণৰ যেতিয়া ওচৰেদি পাৰ হৈ গ’লো, তেওঁলোক নোহোৱা হ’ল;
মই বিচাৰিলোঁ, কিন্তু তেওঁলোকক পোৱা নগ’ল।

37সিদ্ধ লোকৰ জীৱনলৈ লক্ষ্য কৰা, সৎ লোকসকলক নিৰীক্ষণ কৰা;

কিয়নো শান্তিপ্রিয় লোকৰ বংশৰ কল্যাণ হয়।
38কিন্তু পাপী লোক সম্পূর্ণকৈ ধ্বংস হ’ব;
দুষ্টলোকৰ বংশ ধ্বংস হ’ব।

39ধাৰ্ম্মিকসকলৰ পৰিত্ৰাণ যিহোৱাৰ পৰা আহে;

সঙ্কটৰ কালত তেৱেঁই তেওঁলোকৰ আশ্ৰয়।
যিহোৱাই তেওঁলোকক সাহার্য আৰু ৰক্ষা কৰে;
দুষ্ট লোকসকলৰ হাতৰ পৰা তেৱেঁই তেওঁলোকক উদ্ধাৰ কৰি পৰিত্রাণ দিয়ে,
কিয়নো তেওঁলোকে তেওঁতে আশ্ৰয় লৈছে।
40